SBASHK-u: Mësimdhënësit të jenë prioritet për vaksinim kundër COVID-19 

Sindikata e Bashkuar e Arsimit, Shkencës dhe Kulturës e Kosovës (SBASHK) ka kërkuar nga Ministria e Shëndetësisë dhe Instituti Kombëtar i Shëndetit Publik që punëtorët e arsimit t’i kenë si prioritet për t’i vaksinuar me vaksinat kundër COVID-19, shkruan Gazeta Sinjali.

Nga SBASHK-u thuhet se në periudhën e parë të këtij viti shkollor sektori i arsimit ishte nga më të prekurit me COVID-19.

Kërkesa e plotë:

Shifrat e arritura në taskforcën qendrore në MASH kishin dëshmuar se në periudhën e parë të këtij viti shkollor sektori i arsimit ishte nga më të prekurit me COVID-19 dhe kjo kishte bërë që institucionet gjegjëse të merrnin vendim për përfundimin më herët të periudhës së parë të mësimit në tërë sistemin e Arsimit Parauniversitar të Kosovës.

Periudha e dytë e procesit mësimor nisi më 18 janar dhe fillimisht gjendja ishte relativisht e qetë dhe jepte shpresë se do të vazhdohet me mësimin në institucionet  arsimore.

Mirëpo ka ditë që raportet nga ISHKP-ja flasin se fatkeqësisht është në ngritje numri i të prekurve me COVID në vendin tonë.

Kjo e vërtetë e hidhur krijon frikë të arsyeshme se mund të kemi një situatë alarmante në institucionet  arsimore dhe shtim të vazhdueshëm të numrit të të prekurve me COVID, gjë që do të krijojë rrethana të reja dhe situatë kur duhet menduar edhe për versione të tjera të procesit mësimor, duke mos përjashtuar mësimin nga larg, gjë të cilën nuk e dëshiron askush.

Me qëllim që  të  bëhen angazhime konkrete dhe të kemi parakushte modeste për vazhdimin e procesit mësimor në institucionet arsimore SBASHK i drejtohet  me kërkesë publike Institutit të Shëndetit Kombëtar të Kosovës dhe Ministrisë së Shëndetësisë që me të nisur të procesit të vaksinimit kundër COVID-19  në agjendën e tyre të këtij aktiviteti fort të rëndësishëm prioritet të kenë punëtorët e sektorit të arsimit.

Ky do të ishte kontribut konkret me vlerë në shërbim të rrjedhës së mbarë të procesit mësimor dhe përmbylljes me sukses në institucione arsimore të këtij viti shkollor.

Për këtë na duhen punëtorë arsimor të mbrojtur e të mbështetur  nga institucionet, Këshilli i prindërve  dhe shoqëria civile.